Qadın hüquqlarının müdafiəsi ilə bağlı layihəyə start verilib

| 17-02-2022, 20:27 |

"Hüquqşünas Qadınlar Assosiasiyası" İctimai Birliyi Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Qadın hüquqlarının təbliği və müdafiəsi ilə bağlı fəaliyyətin dəstəklənməsi” adlı layihəni Bakı şəhərində həyata keçirir. Layihə 1 fevral tarixindən start götürüb, icra müddəti 4 aydır. Layihənin məqsədi vətəndaşları qadın hüquqlarına dair qanunverici aktlarla tanış edib maarifləndirmək və bu sahədə müdafiə mexanizmlərini təbliq etməkdir.

İB-in sədri Xanım Əhmədzadə layihə haqqında məlumat verərək bildirib ki, Azərbaycan Respublikasının bütün qanun və normativ hüquqi aktlarında qadınların bərabər hüquqlarının təsbit edilməsi diqqət mərkəzində saxlanılır. Ölkədə qadın hüquqlarının qorunması, ailə institutunun möhkəmləndirilməsi, qadın zorakılığı, erkən nigah hallarının qarşısının alınması, qadınların aktiv fəaliyyətə cəlb olunması istiqamətində mühüm uğurlar əldə olunsa da, həllini gözləyən problemlər də mövcuddur.

Qadın hüquqlarının qorunması dünyanın hər yerində olduğu kimi bizim ölkədə də mürəkkəb problemdir. Bəzi hallarda qadınlara qarşı ayrı-seçkilik, ailədə və ya iş yerində qanuna zidd münasibət, zorakılıq halları ətraf mühitdən gizlədilir, nəticədə ailələr dağılır, qadınlar sağlamlıqlarını itirirlər, hətta intihara cəhd edirlər. Ona görə də, qadın hüquqlarının müdafiəsi bütövlükdə cəmiyyət üçün vacibdir və hərtərəfli yanaşma tələb edir. Çünki əksər hallarda qadınlar dövlətin onların hüquqlarının qorunması, müdafiəsi məqsədi ilə həyata keçirdiyi planlardan, müvafiq qаnunlаrdan, proqramlardan, bu sahədə əldə olunan uğurlardan, zərər çəkmişlərə dövlət qayğısından xəbərsiz olurlar.

Bizim İB apardığı sorğular və araşdırmalar nəticəsində belə qənaətə gəlmişdir ki, hüquqi müstəvidə qadın hüquqlarının müdafiəsi üçün güclü mübarizə aparılmasına baxmayaraq cəmiyyətdə qadınlara qarşı zorakılıq, ədalətsiz münasibət hallarının artması müşahidə olunur. Qadın hüquqlarının təbliği və müdafiəsi sahəsində yaranmış problemlərin həllinə kömək etmək, zərərçəkmişlərin haqqlarını qorumaq məqsədi ilə təşkilatımız maarifləndirmə tədbirləri keçirməyi və hüquqi yardım göstərməyi planlaşdırıb. Tədbirlər nəticəsində vətəndaşlar qadın hüquqları sahəsində dövlətin proqramları, planları, siyasəti, mübarizə sisteminin qanuni əsasları, normativ hüquqi bazası barədə məlumat alacaqlar, müdafiə mexanizmləri ilə tanış olacaqlar.