Erkən nikahların qarşısının alınması məqsədilə regionlarda maarifləndirmə kampaniyası keçirildi

| 18-04-2022, 20:24 |

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Azad Həmfikirlər" Gənclərin Maarifləndirilməsi İctimai Birliyinin Tovuz rayonunun Gənclər Evində "Erkən nikahların qarşısının alınması məqsədilə regionlarda maarifləndirmə kampaniyası" adlı növbəti tədbiri keçirildi. Tədbiri layihənin koordinatoru açaraq erkən nikahların qarşısının alınması məqsədilə regionlarda maarifləndirmə kampaniyası haqqında geniş məlumat verdi.

Tədbirdə layihənin hüquqşünası Mətanət Əsgərova erkən nikahların anlayışı, yetkinlik yaşına çatmayan şəxsi nikaha girməyə məcbur etmənin zorakılıq hesab edilməsi, nikaha girməyə məcbur etməyə görə məcbur edən şəxslərin, o cümlədən valideynlərin cinayət məsuliyyəti, zərərçəkmişin dövlət müdafiəsinin xüsusiyyətləri, o cümlədən erkən nikahdan doğulan uşaqların rəsmiləşdirilməsinin və dövlət müdafiəsinin xüsusiyyətləri, erkən nikahların doğurduğu hüquqi problemlər və onların həlli yolları barəsində tədbir iştirakçılarına danışdı. Layihənin eksperti Nailə İsmayılova erkən nikahın baş vermə səbəbləri haqqında auditoriyaya məlumat verdi. Eyni zamanda o, erkən nikaha məcburetmənin sosial-psixoloji fəsadlarının yaranmasında valideynlərin məsuliyyət daşıdıdığını və lazım gəldikdə məsuliyyətə cəlb olunmalarının vacibliyini haqqında danışdı. Sonda gəncləri maraqlandıran suallara dolğun cavablar verildi.