“Zəfər tariximizin regionlarda təbliği” layihəsi çərçivəsində Qax rayonunda tədbir keçirildi

| 14-10-2022, 12:50 |

“Zəfər tariximizin regionlarda təbliği” layihəsi çərçivəsində Qax rayonunda tədbir keçirildi.
Azərbaycan Respublikası Qeyri-Hökümət Təşkilatlarına Dövlət Dəstəyi Agentliyinin maliyyə dəstəyi ilə, “İnkişafa və İslahatlara Dəstək” İctimai Birliyinin təşkilatçılığı ilə keçirilən “Zəfər tariximizin regionlarda təbliği” layihəsi çərçivəsində 13 oktyabr 2022-ci il tarixində Qax Rayonu Heydər Əliyev Mərkəzində tədbir keçirildi. Tədbirdə şəhid ailələrinin üzvləri, müharibə iştirakçıları və Qax rayonu gəncləri iştirak etmişdir. Tədbirdə çıxış edən “İnkişafa və İslahatlara Dəstək” İctimai Birliyinin sədri Ramil Əliyev çıxış edərək təşkilatın fəaliyyəti barədə iştirakçıları məlumatlandırıb. Qeyd edək ki, ictimai birlik fəaliyyət başladığı gündən etibarən şəhid ailələrinin, qazi və müharibə iştirakçılarının mütəmadi olaraq qayğısına qalmışdır. Eyni zamanda layihə barədə də məlumat verərək bildirib ki, layihənin məqsədi Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi zəfərin gənclərə nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə tədbirlərin həyata keçirilməsidir. Aprel döyüşlərinə və 44 günlük “Vətən müharibəsi”- nə həsr olunan 1 günlük tədbirlərin keçirilməsi nəzərdə tutulur. Həmin tədbirlər Balakən, Zaqatala, Qax və Şəki rayonlarında şəhid və qazi ailələri ziyarət olunması nəzərdə tutulur.
Daha sonra, Qax Rayonu İcra Hakimiyyətinin başçının müavini, ictimai-siyasi və humanitar məsələlər şöbəsinin müdiri Vəfa Heydərova çıxış edərək şəhid ailələri, qazilər və müharibə iştirakçılarına dövlət tərəfindən göstərilən diqqət və qayğını iştirakçıların diqqətinə çatdırdı. Milli Qəhrəman şəhid Rəhimov Cavanşirin, şəhid Balaçayev İzzətin, şəhid Qarayev Anarın, şəhid Ağayev Asəfin, şəhid Babayev Samsunun ailə üzvləri çıxış etdilər.
Tədbirdə “Zəfər tarixi”-mizə həsr olunan video təqdimat nümayiş olundu. Sonda Qax rayonu Şəhidlər Xiyabanı ziyarət olundu və xatirə şəkli çəkildi. Allahdan şəhidlərimizə rəhmət, qazilərimizə can sağlığı arzu edirik.